Poetisk interpellasjon

Fylkestinget dato

Frå; Fylkespolitikar

Potensialet for meir poesi og fleire vakre bodskap mellom linjene i fylkeskommunale sakspapir  

Underteikna fylkestingsrepresentant har merka seg at byråkratspråket i saksframlegga frå administrasjonen tidvis har tilløp til poetiske og litterære kvalitetar, særleg legg ein merke til at enkelte av sakshandsamarane har ei nynorsk språkføring som innimellom kan få det til å risle varmt nedetter ryggen på ein fylkespolitikar og få sakene til å springe ut i full bløming når ein sit og les samsframlegg. Underteikna vil likevel framhalde at det er potensiale for enno meir poesi i fylkeskommunale saksframlegg. Meir utstrakt bruk av metaforar, verseføter og bunden form vil sikre relevans og forståing for menneska, sorgene deira og liva deira bakom orda, tabellane og statistikken i saksframlegga. Meir poesi og vakre bodskap mellom linjene vil og kunne ha ein svært positiv effekt på leselysta til fylkespolitikarane, slik at dei folkevalde les saksframlegga betre og er betre førebudd til møta. Tusen sider saksframlegg i månaden vil gå som ein leik dersom det var mogleg å finne noko sant om livet og menneska mellom linjene i saksframlegga. Dette vil heilt sikkert og ha positiv effekt for folkehelsa.

Forslag til vedtak:

Fylkestinget ber rådmannen legge til rette for at dei tilsette i administrajonen får særskilt kurs i poetisk nynorsk språkføring, bruk av metaforar og andre litterære verkemiddel, og å gøyme vakre bodskap mellom linjene. Utfasing av elektroniske saksframlegg på nettbrett og innfasing av stiv perm og rause margar på saksframlegga skal vurderast.