Flora hamnar på svartelista

Det melder Fylkesmannen i Sogn og Fjordane. Flora som konsern har hatt driftsoverskot i fem år på rad, men pengane har vore nytta til andre ting enn å fjerne det udekt beløpet som står i driftsrekneskapen. Denne summen er no på 18 millionar kroner.

Kommunestyret har vedteke at nær 11 millionar først skal dekkjast inn i 2013, resten i år og neste år. Kommuneloven slår i slike høve fast at kommunen må meldast inn i Robek. Det er til vanleg lov å nytte fire år på å fjerne udekt beløp i rekneskapen, men om ein nyttar meir enn to år, hamnar kommunen på svartelista.

– Det betyr at vedtak om opptak av lån eller langsiktige avtalar om leige av bygningar, anlegg og varige driftsmidlar som kan påføre kommunen varige utgifter skal godkjennast av Fylkesmannen. Fylkesmannen skal òg føre lovlegkontroll med kommunen sine budsjettvedtak, melder Fylkesmannen i Sogn og Fjordane.