Fruktbart samarbeid

Kommunane i Midtre Namdal samarbeider mellom anna om kompetansekrevjande oppgåver som kommuneoverlege og smittevern, samt forebyggjande helsearbeid. Det aukar kvaliteten på tilbodet til innbyggjarane i avgjerande grad. Før var Namsos den einaste av kommunane her som var i stand til å drive dette arbeidet på lovleg vis.

Den fyrste grundige registreringa av interkommunalt samarbeid viser at kommunane i Nord-Trøndelag generelt tener godt på samarbeid, rekna både i kroner og kvalitet. Som vi skriv i dagens avis, har konsulent Geir Vinsand talt opp 147 formelle interkommunale samarbeid i Nord-Trøndelag. Det har han gjort på oppdrag frå Fylkesmannen, som åleine har satsa 25 millionar kroner sidan 2003 på å stimulere til samarbeid. I dag legg Vinsand fram kartlegginga, som viser at samarbeid gjev innsparing og betre kvalitet på tenestene. Utfordringa er å få styringsstrukturen på plass.

Små einingar har sine gode sider. Ein kjenner kor skoen trykker. Samstundes veit vi at det er meir enn pengar å tene på stordrift.

Kompetanse og kvalitet er avgjerane på stadig fleire område. Til dømes skjerpar kommunalminister Magnhild Meltveit Kleppa no regelverket som styrer finansforvaltninga i kommunane. Det kan bety interkommunalt samarbeid for å sikre naudsynt kunnskap på dette feltet.

IKT er det kommunane i Nord-Trøndelag samarbeider mest om. Omsynet til innbyggjarane tilseier at fleire kommunar bør samarbeide på fleire felt. Men som Vinsand peiker på i forbindelse med den ferske utgreiinga, treng administrasjon, politikarar og innbyggjarar meir formalisert samarbeid - om vi skal halde på dagens kommunestruktur. Mange samarbeid og mange styrer på tvers er uoversiktelege. Når ein tydeleg ser så god effekt av samarbeid og deling av ressursane, er det grunn til å vurdere nok ein gong kor lenge vi skal leve med ulempene ved mange små kommunar.

Skrevet av: Kommunal Rapport