Ny rådmann i Solund

– Kvifor vil du vere rådmann?

– Kommune er eit nytt område for meg, og det er ein allsidig og spennande jobb. Eg får innsyn i kommunane sine utfordringar og kan påverke avgjersler og prosessar.

– Korleis er overgangen frå ein bransje som driv med fargar og måling?

– Overgangen frå det private er merkbar. Størst forskjell er det på sakshandsaminga, med den politiske delen i kommunen.

– Korleis er erfaringa med det politiske miljøet så langt?

– Eg har vore i eitt formannskapsmøte. Utgangspunktet er bra. 

– Kvifor akkurat vesle og øyrike Solund, den vestlegaste kommunen i landet?

– Det er eit stort sprang frå Göteborg, der vi flyttar frå. Men vi har snakka i fleire år om flytte tilbake til Vestlandet. Det blei til slutt eit verdival, kombinert med jobbutfordringar. 

– Korleis vil du karakterisere deg sjølv som leiar?

– Ha ha, ja, eg er ein resultatorientert og målmedviten person. Flink til å lytte. Eg prøver å vere inkluderande. Eg legg vekt på delegering, og eg har fått høyre at eg har diplomatiske og empatiske evner.

–Kva er den største utfordringa for Solund no?

– Å leggje til rette infrastruktur for nyetablering av arbeidsplassar og vekst i folketalet. Og sjølvsagt få samsvar mellom økonomiske rammer og tenester. Vi må sjå på drifta, vi og.

– Kor aktuelt er samanslåing for din kommune?

– Så vidt eg veit, så er det ikkje på dagsordenen, men vi har eit godt etablert interkommunalt samarbeid.

– Om du blei redaktør for ei utgåve av Kommunal Rapport, kva ville du prioritere?

– Å synleggjere dei utfordringane som mindre utkantkommunar står over for. Det handlar til dømes om kommunikasjon på alle vis, frå IT til vegar og sjøtrafikk, samt å knytte til seg faglært personale.

– I kor stor grad nyttar du sosiale media?

– For å vere ærleg, så er eg verken på Facebook eller Twitter. Men resten av familien er aktiv.

– Kva gjer du på fritida?

– Vi har hytte på fjellet, på Hardangervidda, så der er det mykje turgåing. Sjøliv blir det sikkert meir av no når vi skal bu her på Vestlandet. Vi skal kjøpe båt.

– Kva for ei bok kan du rå lesarane av denne spalta til å lese?

– Eg er ikkje av dei som les mest, men har nett lese krim av Nesbø. Det er bra.

– Kven vil du invitere med på ein middag for to?

– Kona.