Gjev 5 millionar til valtiltak

Det melder departementet på eigne nettsider i dag, onsdag. Debattar, valaviser, nettsider på ulike språk og avis i blindeskrift er blant tiltaka.

Departementet skriv at det særleg er tiltak mot ungdom, innvandrarar og veljarar som treng særleg tilrettelagt informasjon, som er prioritert.

– Innvandrarar og ungdom har lågare valdeltaking samanlikna med andre grupper i samfunnet. Eg håper at tiltaka kan bidra til at blant andre fleire ungdom og nordmenn med innvandrarbakgrunn vel å bruke røysteretten sin, seier kommunal- og regionalminister Liv Signe Navarsete i ei pressemelding.

82 søknadar

Departementet fekk 82 søknadar. Organisasjonane som no får pengar skal mellom anna arrangere seminar om demokrati, valduellar og valmøte, dei skal lage radiospottar på ei rekke ulike språk, lage eigne valaviser og spreie informasjon gjennom nettverksarbeid.

Stiftelsen Klar Tale får mest pengar, 808.500 kroner, til å gi ut ei særskilt utgåve av avisa Klar Tale om valet. Avisa har eit opplag på 100.000, inkludert papirutgåve, lydutgåve på CD og avis trykt i blindeskrift.

Landslaget for lokalaviser har fått 750.000 kroner til mellom anna å lage valavis og valkalender, halde valkonferanse, opprette eit ungdomspanel, lage meiningsmålingar og gi ut eit idéhefte om korleis ein kan auke valdeltaking.

Vil auke engasjement om fylkestingsval

Blant dei andre som har fått pengar er Vest-Telemark næringsutvikling (150.000 kroner), som skal halde eit tverrpolitisk valarrangement for heile Telemark med politiske debattar og tema. Målet er å auke engasjementet for fylkestingsvalet i Telemark og å få fleire til å røyste i valet.

Du kan sjå heile lista over tildelingar på nettsida til departementet.