Medan det i 2008 var heile 131 kommunar som låg meir enn 5 prosent under snittet i korrigert inntekt, var det i fjor 100 slike fattigkommunar, syner tabellen for korrigert inntekt i kommuneproposisjonen.

Aurskog-Høland var i fjor den einaste kommunen som hadde ei korrigert inntekt som låg meir enn 10 prosent under snittet. Lokalpolitikarane i kommunen har 89 kroner til å drive eit tilbod som eigentleg kostar 100 kroner.

Kommunaldepartementet set saman frie inntekter med kor dyrt det er å gje eit standard tilbod i kommunen, basert på kostnadsnøklane i inntektssystemet. Ein kommune med låge inntekter som samstundes er rimeleg i drift, har høgare korrigert inntekt enn ein nabo med dei same inntektene og dyrare innbyggarar, sosiale høve eller geografi.

Må drive meir effektivt

Litt forenkla skal kommunar som ligg over snittet i korrigert inntekt ha høve til å gje eit betre tilbod enn dei som ligg under snittet. Dei med låg korrigert inntekt må enten drive meir effektivt enn andre, eller ha lågare omfang eller kvalitet på nokre tenester.

Det vart samstundes fleire rikingar blant kommunane. I 2008 hadde 82 kommunar meir enn 20 prosent høgare korrigert inntekt enn snittet. I fjor auka talet til 91.

Bykle, Modalen og Eidfjord er som vanleg dei suverene krøsusane, men dei har alle vorte mykje mindre rike samanlikna med dei andre kommunane i landet. Medan Bykle i 2008 hadde 387 prosent av korrigert inntekt til ein snittkommune, gjekk dette ned til 333 prosent i fjor.

Utsira blant dei nyrike

Dei kommunane som utvikla seg best i fjor er Utsira og Aukra. Utsira nyt godt av somme tekniske endringar, medan Aukra no byrjer å få store inntekter frå eigedomsskatt.

Terra-kommunane Vik, Bremanger og Hattfjelldal er nokre av dei som har auka korrigert inntekt kraftig i 2009. 

Kommunar med høgast korrigert inntekt

Eigedomsskatt og konsesjonskraft er med i tala. Snitt = 100.

Kommune            2009            Endring frå 2008

0941 Bykle            333            -54

1252 Modalen            285            -18

1232 Eidfjord            280            -28

1151 Utsira            279            +99

1046 Sirdal            243            -9

1547 Aukra            213            +40

1421 Aurland            204            -9

1129 Forsand            199            -1

1665 Tydal            198            +13

1026Åseral            191            -8

Kommunar med lågast korrigert inntekt

Eigedomsskatt og konsesjonskraft er med i tala. Snitt = 100.

Kommune            2009            Endring frå 2008

0221 Aurskog-Høland            89            0

0128 Rakkestad            90            +1

1002 Mandal            90            +1

0701 Horten            90            +2

1657 Skaun            90            +2

0236 Nes            90            +1

0711 Svelvik            90            +1

1032 Lyngdal            90            +1

1663 Malvik            90            +1

0914 Tvedestrand            90            +1