Seljord er Årets nynorskkommune
Godt språkarbeid for barn er blant grunnane til at Seljord kommune får prisen Årets nynorskkommune 2010.
– Juryen har vurdert kandidatane grundig. Særskilt vil eg trekkje fram at vinnaren Seljord kommune driv godt språkarbeid for barn. Eg håpar prisen vil styrkje bruken av nynorsk både i Seljord og i andre kommunar i Telemark, seier kommunal og regionalminister Liv Signe Navarsete (Sp).
Juryen seier mellom anna at Seljord kommune har laga ein plan og eit lokalt verktøy for språkstimulering i barnehagane. Dei har og laga ein plan for lese- og skriveopplæring i grunnskulen. Juryen har også lagt vekt på at kommunen ligg i eit tradisjonelt nynorskfylke, men der nynorsken mange stader likevel er under press.
(©NTB)